النهاية الحلوه لبداية احلى

 نهاية  تحدي 29يوم 

نهاية 29يوم كلش ضاف لحياتي طاقه حلوه وقويه 

نرجع من البداية🏃🏻‍♀️🏃🏻‍♀️🏃🏻‍♀️

اني آمنه من بغداد عمري 23سوه بديت التحدي وابالي اتحدى نفسي بتصميم قطع ملابس من المكرميه

هذا التحدي الرئيسي 

ومصادري الي اتعلم منها جان لاشي لانه تعليم ذاتي 

فجان صعب  ومرات محبط بس اوك راح اكمل وتطلع مثل مااريد والي ساعدني لازم كل 3ادز وين وصلت فجان مثل الدافع الي اكمل

نشرت هل2 فديو بشكل مختصر مراحل الشغل 

وفخوره كلش وفرحانه بيها وان شاء الله انجز اكثر وانشر بالمدونه حالياً داشتغل بجنطه حتى شويه اجدد طاقتي لتصميم الملابس

خلال هذا التحدي بديت انظم جوانب مختلفه من حياتي مو بس اصمم مكرميه لا انتبهت لجانب الصحي وبديت نظام الكيتو وقطعت بالبداية الخبز والتمن وبعدين الشكو وشويه وشويه لما كدرت التزم بي

 وقبل 3ايام بلشت العب رياضه شويه شويه حتى تصير عاده حلوه

.

ومن بديت التحدي كدرت اخلص كتاب..اوك هو كتاب شي قليل اعتبره

 لانه اني احب اقرا هوايه واكمل اكثر من كتاب بشهر بس اجاني بلوك من القراءه جان شعور كلش محلو

فبديت ويا نفسي بهذا التحدي  اشتريت كتب تساعدني حتى يرجع الواهس وبديت اقره كل يوم شويه وكملته 

وهسه داقره بالكتاب الثاني لحد ميرجع واهسي مثل قبل واكثر

ضافلي التحدي مهارة الاستمرارية بحياتي لانه احب انجز هوايه فابدي باكثر من شغله ويضيع تركيزي ابيناتهم 

فبديت اركز على شغله شغله اكملها واضبطها وانتقل للثانيه ودااحاول بيها لما تصير عاده ♥️

والي حبيته اكثر لبست هدوم العيد من تصميمي..(جان هو فرحة العيد )

وكهدية لنفسي لانه عيدميلادي الاول من سبتمبرراح استمر بفكرة التحدي بامور مختلفه لمدة 4شهور 

واضيف عادات حلوه الي مثل ميكولون اصقل نفسي واعلمها على شي جديد تكون هديه معنويه ومختلفه هل المره😎

ناويه على اشياء حلوه اتعلمها وبنفسي من زمان 

بس مراح الكدر الزمها كلها بوقت واحد واضبطها لهذا خصصت 4اشهر حتى يصحلي وقت اكثر 

والنقطه الي تخبل بالتحدي عادة نشوف منشورات الانستكرام  يكون(اكل،طلعات، الفاينل...الخ  )بس بهذا التحدي صار نشر الانجازات

 اشوف الناس يحجون احنه كدرنه ننجز فلان شغله وسوينه فلانه 

شي تلقائياً الطاقه توصلك وتنطيك حافز حلو وصارت المنشورات بيها محتوى وقيمة اكثر

.. هم صح نسبة قليله بس ان شاء الله تكثر اكثر واكثر

وبالنهايه كلش ممتنه لنفسي وللبطه🐣 (نومي )راح تشوفها بالفديو ساعدتني نفسياً😅..!

اجتي للبيت خلال مدة التحدي 

وامتنان لمرتضى وافكاره الحلوه  وفريق العمل كلهم التزموا وكملوا ويانه كلش شكراً الكم

اليووم ال20 من التحدي

اليوم ال20 من التحدي  

هلوو اصدقاء شونكم اليوم مدونة 20 يوم على مرور تحدي 29 يوم... كلش متحمسه واني اكتبلكم لانه صارت هوايه 

نجازات عندي بهل ال10 ايام ...وبما انه فكرة التحدي الاستمراريه وهذا احلى واصعب شي بالنسبه االي لانه اني احب 

اشتغل واجرب هوايه شغلات وبعدين ماالحك التزم بيها وتنعاف عندي 

لهذا هذا التحدي خليت تركيزي على الاشياء الي احبها والضروريه اركز عليها واكيد اهم شي استمر بيها .

وارجع لمشاركتي الرئيسيه للتحدي وهي تصميم فن المكرميه:-(وهل المره تصميم جاكيت )

طن فرحه ببداية  شغلي بي لانه تعلمت بي كومه جنت قبل اغلط بيها بس هل المره بديت وعرفت شون ابدي صح اخذ مني 

وقت هوايه بس النهايه الحمدالله عرفت الطريقه, واستمريت بيها اشتغل ل3 ايام وبحدود 5 ساعات تقريبا كل يوم ومرات ياخذني 

الواهس لساعات اكثر .

ولون الخيط الي هل المره الي اختاريته كلش انطاني واهس لانه اني كلش  اعشق الالوان وخصوصا بالمكرميه ونوعية قطنيه هم تخبل 

اللون جان نفس لون الكتابه اخضر فسفوري  :)

 

اني بالنسبه الي من وصلت هل المرحله كلشش تطور جبير يعني تقريبا كدامي يومين وتخلص القطعه 

المهم مااطول عليكم السالفه من كدرتها طلع عندي خطا بالقياس ويحتاج افتحها كلها من جديد يله اكدر اضيف عليها خيوط اضافيه

سهرت لل2 بليل واني افتح شغل الساعات الهوايه 😓...

مشاعري احباط  باحباط فتوقفت مكدرت اكمل كل واهسي راح . 

ورجع الشغل كله خيوط خام مثل البدايه :(... 

بس ان شاء الله هل الايام ارجع اشتغل بي مثل مكلت قبل هو تعليم ذاتي فيعتمد على التجربه لهذا يكون اصعب والخطا بي مزعج . 

والقرار من ارجع اشتغل راح يتغير التصميم.بس ان شاء الله اكلمها يعني اكملها 

اني كاتبه بالمدونه السابقه انه حطيت بالتحدي شغله ثانويه وهي قراءه اللغه الفرنسيه فاستغليت وقت الي مخصصته بشغل المكرميه

بتعلم اللغه .

وهاي هوسه الدراسه :)

اما بشنو استمريت عليه (غير المكرميه ) التزمت واخيرا بنظام الكيتو 

لانه ببدايه التحدي جانت بدايتي بالنظام الكيتو بشكل تدريجي اول شي اترك الاشياء وابقي اشياء لما

 جسمي يتعلم وقبل يومين التزمت التزام كلي 

كلش حابه تقدمي بي واستمراريتي .

وبديت بكتاب جديد (داارجع واهسي للقراءه شويه شويه ويا هذا التحدي )

وهسه نجي للفقره الحلوه وهي الامتنان :-

امتناني كوومه بس راح اختصرها وبالمناسبه اني مخصصه دفتر للامتنان لانه فعلا غيرني كومه

-كلش ممتنه لنفسي والتزامي بهذا التحدي 

- ممتنه للمنيكان لانه تحملتني كوومه وتحملت اخطائي 

- ممتنه لهاي المدونه ومناويه اعوفها ان شاء الله لانه كلش حبيت من اجي اكتب انجازاتي وامتناني للمدونه يرجع للامتناني للتحدي ولمرتضى وفريق العمل..:)

 اهلا اهلا 

اني امنه ومشاركتي بالتحدي جانت بتصميم المكرميه والصراحه اني عممت التحدي باجزاء واهداف صغيره من يومي لانه فكرة التحدي

 الاساسيه هي الاستمراريه فكل شي اني باديه بي وعايفته قررت اكمله يعني اكمله...من ابسط شي ولاعلى شي

مثلا شي كلش بسيط اني استمريت من بدايه التحدي كل يوميه اخذ الفيتامينات (لانه كلما ابدي بيها انساها والتهي واعوفها) فهل المره الحمدالله استمريت

 هو انجاز كلش بسيط بس بالنسبه الي واووو :) ...واستمراريه الثانيه وهي (اني دودة كتب وكلش احب اقرا بس اخر فتره انقطع واهسي

 ابدي بكتاب واعوفه) بهاي ال10 ايام كملت كتااب وكلش فرحانه بهل الانجاز كدرت اوفر وقت واجيب الواهس واقرا باستمتاع ..

كتلكم اني راح ابدي ويا هذا التحدي نظام الكيتو كتغذيه صحيه الحمدالله بديت اول شي بهذا ال10 كطعت السكريات والكاربوهيدرات ولو

هل اليومين صار غش هههههه بس بنسبه قليله لانه ممتواجده بالبيت فمكدرت التزام (الالتزام يكون من ارجع ان شاء الله)

اما بالنسبه لقراءه اللغه الفرنسيه للاسف موكلش التزمت بس داحاول شويه شويه 

وهسه ارجع للاساسي واشتراكي بالتحدي الي هو تصميم قطعة ملابس من المكرميه 

جان التزامي واستمراري بيها كلش حلووو وكلش فرحانه بانجازي رغم كوومه احباطات مثل مذكرت قبل انه تعليم ذاتي فخطوه خطوه

 اعلم نفسي مستعملت يوتيوب ولااي مصدر تعليمي..

بالنسبه للوقت الي خصصته بالمكرميه صراحه مااعرف لانه من اشتغل انسه نفسي والوقت ومن اكوم اشوف ساعات ماشيه ...تقريبا 

اول 6 ايام كلش حبيت مشيتي بيها بس صار لود بوقتي هل الايام فكدرت اخصص وقت قليل مو مثل الاول بس ان شاء الله هاي فتره 

قليله وارجع اخصصلها 6 ساعات واكثر 

المفاجات الي صادفتني بالشغل تخبل كالعاده بتصميم المكرميه يعني عادي اكمل الشغل واشوف اكو عقده معقوده غلط وارجع افتح 

الشغل كله الي ضيعت عليه ساعات مومبالغه بس الاحساس بوكتها لانه اريد ابجي لوخلاص مااريد اشتغل بعد هههههههههه..

بس يله ميخالف حتكمليها وحتطلع تخبل تواسيني:) ( اشجع نفسي ) ..

 يي واكو مفاجات خارجيه خطار مثلا وطلعه سريعه وبعدين تضطر تطول 

واهنا الخطه متمشي مثل متريد او حفله بوقت غير متوقع وتعالي رتبي امورج  حتى تلحكين توازنين  .. بس نسيت اكلكم رغم هذا كله

من بديت بالتحدي كلش قللت الطلعات المو مهمه حتى اركز على استمراريتي بالتحدي والانجاز الي لازم اكمله بفلان وقت 

هذا الشي كلش ساعدني 

وهذا الشغل باختصار ب3 صور :

 هذا مو نهايه الشغل بعد كومه لمسات وتفاصيل يحتاجلها بس الي وصلتله بايام قليله اعتبره كلش انجازوبوقت قليل

هذا التحدي بهاي الفتره جان استمراريه كلش حلو ومتحس نفسك وحدك طاقه الناس الي مشتركين بهل التحدي وياك 

وبالنهايه امتنان جبير لصاحب فكره التحدي مرتضى والاصدقاء الي وياه والي خلو التحدي ينجح ومتواصل 

وشكرا :) 

تحدي 29يوم

مرحبا وهله بيكم بمدونتي 

اني آمنه سالم،اسكن ببغداد وعمري 23 

مصممة مكرميه,بديت بتعلم تصميم قطع مكرميه بسيطه وبعدين حبيت اخصص المكرميه بتصميم الملابس  

فقررت ادمج بين تصميم الازياء بخط المكرمية .

اشتركت بهذا التحدي وكلش حبيته لانه راح يساعدني اخصص وقت اكثر للتصميم والشغل وللاستمراريه واطور نفسي اكثر واوصل مرحلة اعلى ان شاء الله , بهذا التحدي ناويه ان شاء الله اصمم 3قطع ملابس 

طبعاً القطعه الوحدة تطول كلش هوايه تقريباً اسبوع  او مرات اكثر لانه الشغل يكون من عقدة خيط خيط ,

وهاي صوره لشغلي :

كلش مهتمه بنشر ثقافة المكرميه في العراق وذلك لندرتها وعدم معرفة الناس بها  لهذا انشر خطوات الشغل على الانستا وهذا حسابي :amnaa.salm

 

_ وايضا كلش احب القراءه واحب اطور نفسي بهوايه امور طبعا الهدف الرئيسي  من التحدي تصميم المكرميه والى جانبها الالتزام بنظام الكيتو مو الغايه ضعف وانما لصحه اكثر 

واحب اتعلم اللغات وحاليا داقره حتى اخذ ان شاء الله مستوى B1باللغه الفرنسيه 

واحب الاهتمام بالنباتات واحب التامل.

شكرا لوقتكم لقراءه مدونتي.